BAGUIO CITY – Nakasaganan ti lokal a gobierno ti siudad ti Baguio para iti isasangbay dagiti turista iti umadanin a holy week.
Iti interview ti Bombo Radyo kenni City Administrator Engr. Bonifacio Dela Peña, namnamaenda ti 50,000 agingga 80,000 a bisita ti agturong iti siudad tunggal aldaw.
Gapu iti dayta, manamnama a maideploy ti nasurok sangaribo nga operatiba para iti seguridad, kinatalna ken pagsayaatan ti aglawlaw.
Karaman kadagiti maideploy ket dagiti pito gasut a kameng ti Baguio City Police Office, tallo gasut a volunteer, kameng ti City Disaster Risk Reduction and Management Office, ken dadduma pay nga ahensia.
Kinuna ti nasao nga opisial nga adda ti maipaulog wenno mai-post a traffic scheme tapno naanayas ti gunay ti lugan nangruna kadagiti nalalatak a pagpasyaran.
Impasigurado met ni Dela Pena a kabaelan pay ti siudad a mang-akomodar kadagiti bisita kadagiti accommodation stablishments wenno pagdagusan.
Nupay kasta, nagballaag daytoy iti publiko maipapan ti scam gaputa adu paylaeng dagiti mabikbiktima a kas iti napalabas a Panagbenga Festival idi napalabas a bulan.
Guyguyugoyenna ti publiko a nasaysayaat nga agkita dagitoy iti VISITA APPlication ta lehitimo dagiti pagdagusan a pagpilyan sadiay.
Kabayatanna, nu man pay saan a maiparit ti mangipatungpal iti konsyerto wenno aniaman a pagragsakan, kidkiddawen ni Dela Peña a rumbeng a mairespeto ti holy week nangruna ti Biyernes Santo gapu ta daytoy ti aldaw ti ipapatay ni Hesu Kristo.//Bombo Benjo Guzman
