BAGUIO CITY – Umaw-awat ti lokal a gobyerno ti Baguio City iti boluntaryo a donasyon manipud iti publiko para kadagiti biktima ti serye ti gingined a dimmayeg sadiay Mindanao ken Batanes.
Maibasar iti pagalagadan, dagiti donasyon a kwarta ken ‘in kind’ ket direkta a maiturong iti City DRRM Office a masarakan iti compound ti City Engineering Office sadiay Lower Rock Quarry manipud Lunes agingga Biyernes.
Silulukat ti nasao nga opisina iti alas-8 ti agsapa agingga alas-5 ti malem ken agpaso ti panag-awat kadagiti donasyon inton November 30, 2019.
Mabalin met ti donasyon a maiturong iti bank account ti City Government of Baguio (makita iti ladawan).
Mabalin a maidonar dagiti unused clothes, dagiti taraon nga addaan iti halal certification, hygiene kits ken ules bayat a saan nga awaten dagiti in-charge dagiti used clothes ken perishable items.
Sigun kenni Mayor Benjamin Magalong, dagiti maur-or a donasyon ket mainayon iti P2-M nga immunan nga inaprobaran ti lokal a konseho a maipaay kadagiti biktima ti gingined.
Naamuan a ti P1.5-M ket maited kadagiti apektado a lugar sadiay Mindanao bayat a ti P500-K ket maipaay sadiay Batanes.
Mangnamnama pay ti Baguio a makarekober dagiti biktima dagiti nasao a gingined a kas iti napasamak iti siudad kalpasan ti panagdayeg ti killer quake idi July 16, 1990.
