BAGUIO CITY – Agtultuloy ti imbestigasyon ti pulisya iti ipupusay ti maysa a lola kalpasan a tinagtagbat dagiti saan pay a nabigbig a suspek sadiay Bakwit, Allaguia, Pinukpuk, Kalinga idi rabii.
Nabigbig ti biktima a ni Vicenta Maiyao Leyang Maiyao, 60, balo, ken residente iti nasao a lugar.
Maibasar iti blotter ti pulisya, nagturong iti balay ti biktima ni Jan Jan Maiyao Baggay tapnu alaenna ti cellphone number ti kabsat ti biktima a ni Miyer Maiyao.
Nagtoktok daytoy iti ridaw ngem awan ti simmungbat iti baet a nakalukat ti silaw iti uneg ti balay.
Nagsirip daytoy iti bassit nga abot ken nakitana laengen ti biktima a nakadasay iti datar isut gapuna a dagusna nga inyuman daytoy kadagiti kabagian ti biktima.
Iti panagresponde dagiti kameng ti Pinukpuk PNP ket nadanonanda ti bangkay ti biktima a nagsagrap iti tagbat iti tenged, muging, timid, ken ima daytoy.
