BAGUIO CITY – Matamtaming iti ospital ti maysa a lolo kalpasan a nadangran iti panagbettak ti saan pay laeng a naamoan a device sadiay Barangay Lunas, Barlig, Mt. Province idi kalman.
Nabigbig daytoy a ni Patawang Fiarotac Wanchag, 69, mannalon ken residente iti nasao a lugar.
Maibasar iti inisyal nga imbestigasyon, nakangeg ti asawa ti biktima a ni Emilliana Chattom Wanchag iti napigsa a kanalbuong ngem saanna nga inkaskaso gaputa patienna a nagtaud daytoy iti manarimaan a road construction sadiay.
Kalpasan ti panangitulodna kadagiti apokona iti pagadalan ket agturong kuman daytoy iti talon idi nakitana ti asawana a nakasanggir iti nadadael nga stone wall ken agsaysayasay ti dara iti bagi daytoy.
Impakaammo ti biktima nga aksidente ti napasamak gaputa pabettakenna kuma ti dakkel a bato babaen iti saan a naamoan a device idi aksidente a bimtak daytoy iti asideg kenkuana.
Naitaray ti biktima iti Barangay Lunas Rural Health Unit para iti first aid sakbay a naiyakar iti Barlig District hospital.
Naiyakar manen daytoy iti Luis Hora General Hospital para iti kanayunan a treatment.
