BAGUIO CITY – Sumangsango iti kaso nga alarm and scandal ken illegal possession of explosives ti maysa a lalaki kalpasan a pinabettakna ti maysa a bomba gaputa panggepna a kettelen ti bukodna a biyag sadiay Kayang, Hilltop, Baguio City idi kalman.
Daytoy ket agtawen iti innem a pulo ket maysa, sigud a miyembro ti Philippine Constabulary ken residente ti nasao a lugar.
Maibasar iti report, agsagsagaba ti suspek iti asthma ken arthritis a rason tapnu paawiden daytoy ti live-in partner-na iti pagtaengan ti kabsatna sadiay Quezon Hill, Baguio City.
Kabayatanna, kalpasan ti panangitulod ti maysa a concerned citizen kadagiti annakna iti pagadalan ket nakangngeg daytoy iti panagbettak isut gapuna a nagturong daytoy iti balay ti suspek.
Ditoy a nakitana ti nakadasay ken daradara a suspek isut gapuna a dagus daytoy a nagkiddaw iti tulong tapnu maitaray iti pagagasan ti nasao nga indibidual.
Segun met kenni PSSupt. Ramil Saculles, dadaulo ti BCPO, maatap a ginandat a kettelen ti suspek ti bukodna a biyag gapu iti sakit daytoy ken gapu iti depresyon nangrunata adu nga agas ti in-inomenna ken awanan pay daytoy iti trabaho.
