BAGUIO CITY – Sumangsango ita iti kaso a panagrames ti maysa a lolo gapu iti namin adu a panangramesna iti mismo nga apokona sadiay Lower Loakan-Liwanag, Baguio City.
Sigun iti pulisya, ti suspek ket 64-anyos bayat a ti biktima ket 15-anyos nga addaan posibilidad ti developmental delay.
Naduktalan iti imbestigasyon dagiti pulis a namin adu a daras a sekswal nga inabuso ti nasao a lolo ti apokona a balasitang.
Naamuan nga inaklon ti biktima iti inana a minolestiya daytoy ti lolona bayat ti panagdigusna.
Gapu iti daytoy, inturong ti ina ti anakna iti ospital ken sadiay a naduktalan a 22 a lawas a masikog ti balasitang.
Imbutaktak pay ti biktima a namin adu daytoy a rinames ti lolona bayat nga awan iti pagtaenganda ti nagannakna.
Gapu iti daytoy, inreklamo ti ina ti nasao a lolo iti istasyon ti pulisya ken naipilan ti darum kontra iti suspek.
