BAGUIO CITY – Malamlamayan ita ti maysa a lolo a pimmusay kalpasan a sinangdo ti nuwang sadiay sitio Domeguiay, Brgy. Caupasan, Danglas, Abra idi kalman.
Nabigbig daytoy a ni Gregorio Arcal Pilor, 74, ken residente ti Brgy. Pidipid, La Paz, Abra.
Maibasar iti imbestigasyon, paturong ti kasinsin ti biktima ken ti anakna daytoy iti talon idi nakitada ti bangkay ti dara-dara a bangkay ti biktima iti dalan iti abay ti nuwang daytoy.
Dagus nga inreport-da ti insidente kadagiti opisyales ti barangay ken iti Danglas PNP.
Iti panangiproseso ti scene of the crime operatives iti crime scene ket naduktalan nga addaan iti sugat ti ulo, barukong ken likod ti biktima nga intunda ti sara ti nuwang.
Nagkedked met ti pamilya ti biktima nga ipasidong iti otopsiya ti bangkay daytoy gaputa patienda nga aksidente ti napasamak.
