Imbinglay ni Department of Trade In Industry Assistant Secretary Grace F. Baluyan manipud Kalinga dagiti nagbalin a karitna kas maysa nga ina ken kas maysa metlaeng a public servant.
Iti panakiuman ti Bombo Radyo kenkuana, kinuna nga adda dagiti karit a nagdalanan daytoy kas maysa nga ina kas ti long distance parenting agsipud ta nakadestino daytoy sadiay Manila.
Nupay kasta saan a nagbalin a lapped daytoy gapu ta dakkel a tulong kadakuada ti social media babaen ti panagcontact-da iti tumunggal maysa.
Kinuna a super blessed daytoy kas maysa nga ina agsipud ta addan iti bukod a biag dagiti lima nga anak daytoy ken agtratrabaho pay dagitoy malaksid laeng iti maysa.
Nupay kasta, kasapulan latta ti suportana kas maysa nga ina kadagitoy.
Kabayatanna, nalaos ti panagyamanna gaputa nasisingpet dagiti annakna, matured, ken saan dagitoy nga spoiled iti baet a dagiti laeng yaya dagitoy ti kaduada idi uubbingda pay.
Iti baet ti kinaadu ti trabaho ken pakakumikomanna kas maysa a public servant, saanna latta a binaybay-an dagiti annakna kasta met ti akemna kas maysa nga asawa no sadino kasapulan latta ti quality time para kadagitoy ken iti metlaeng komunikasyon tapno nasayaat latta ti relasyon dagitoy nga agpapamilya.
Nupay aginnadayoda nga agasawa, impettengna a napateg para iti natibker a relasyon ti panagbalin a napudno, panagkomit, ayat ken ti panagaramid iti akem kas maysa nga asawa ken ina.
Innayonna a kanayun latta nga ikarkararagna a nasayaat latta ken nasalun-at ti pamilyana iti baet a nagiinadayo dagitoy iti tumunggal maysa.//Rose
