Awan ti nailista ti Baguio City Police office a kaso ti panagtakaw bayat ti “long weekend”.
Iti panakiuman ti Bombo Radyo kenni Police Major Harriet Bulcio, panakangiwat ti Baguio City Police Office, napateg ti presensya dagiti kapulisan nangruna kadagiti nalalatak a pagpasyaran iti siudad nga isu a kadawyan a nagturongan dagiti turista.
Sigun kenkuana, pinagsaganaanda ti isasangbay dagiti turista bayat ti long weekend nu sadino dumanon iti naurok tallo gasut (300) a miyembro ti pulisya ti naideploy kadagiti nagduduma a pagpasyaran iti Baguio City.
Kagiddan dayta, dinakamat ni PMaj. Bulcio a naobserbaranda ti panag-ado ti turista sipud rabii ti Huwebes idi napan a lawas kasta met ti panagdagsen iti gunay iti trapiko manipod Biernes agingga Dominggo.
Kabayatanna, saan metten a kinasapulan dagitoy ti agnayon kadagiti kameng iti pulisya gapu ta umdas paylaeng ti bilang dagiti kapulisan a naideploy manipod iti Baguio City Police Office.//Bombo Rob Dominguez
