Mapatta-patta a sumrek iti Philippine area of responsibility (PAR) inton bigat, Hunio 6 ti low pressure area (LPA) a nasaripatpatan iti daya a paset ti northeastern Mindanao wenno Caraga region itay laeng alas-3:00 ti malem.
Sigun iti state weather bureau, ti trough wenno extension ti LPA ket mangyeg iti nawaras a panagtudo kadagiti paset ti Eastern Visayas ken Caraga regions.
Kinuna ni state weather specialist John Manalo a posible a mabukel ti nasao nga LPA kas bagyo ken daytoy ti posible a kaunaan a bagyo iti pagilian ita a tawen ken maawagan a local name nga “Auring”.
Nupay kasta, inlawlawagna a nababa ti tsansa a mabukel daytoy kas tropical cyclone iti sumaruno a 24 nga oras ken mabalin a ma-develop inton umay a lawas.
Nababa metlaeng ti tsansana a pumigsa daytoy kas tropical depression.
Manamnama a maysa wenno dua a bagyo ti umuneg iti pagilian ita a bulan ti Hunio.
