Inwaragawag ti Land Transportation Franchising and Regulatory Board (LTFRB) a mangisayangkatda ti Libreng Sakay (free ride program) tapno matulongan dagiti commuters a maapektaran iti dua nga aldaw a transport strike inton Abril 15 ken 16.
Kasaruno daytoy ti inwaragawag ti transport groups a PISTON ken Manibela a mangisayangkatda ti nationwide transport strike inton sumaruno a lawas iti baet ti umad-adani a deadline para iti panagtitipon dagiti drayber ken operator ti public utility vehicle (PUV).
Sigun kenni Mar Valbuena, presidente ti MANIBELA, namnamaenda ti agarup 30,000 a jeepney drivers iti National Capital Region ken agarup 100,000 manipud iti dadduma pay a paset ti pagilian.
Kabayatanna, impaganetget ti Land Transportation Franchising and Regulatory Board (LTFRB) a masapul a malpas ti PUV consolidation inton Abril 30, kas imbilin ni President Ferdinand “Bongbong” Marcos Jr.
Nu pay kasta, kinuna ti PISTON ken MANIBELA nga ag-operateda latta uray no napalabasen ti deadline ti Apri 30.
