BAGUIO CITY–Im-imbestigaran paylaeng dagiti pulis ti pakabigbigan ti indibidual a nangipatulod iti text message a naglaon ti bomb threat iti opisina ti Land Transportation Office (LTO) – Baguio Branch idi malem kalman.
Sigun iti pulisya, naawat ti hotline number ti ahensia ti nasao a text message iti alas dos ti malem ngem nabasa laeng daytoy ti nakaduty iti information desk a ni Rocelle Marie Cruz iti pasado alas dos biente ti malem.
Nailanad iti text message manipud iti cellphone number a 0907-288-2353 nga adda ti bomba iti ruar ti LTO-Baguio ken bumtak daytoy iti alas dos ti malem.
Nailanad pay iti udi ti mensahe ti Allahu Akbar a kaipapananna ket “God is Greater”.
Nakadanun ti nasao nga impormasyon kadagiti pulis iti agarup alas kwatro ti malem.
Iti panagresponde dagitoy, nangipatungpalda iti paneling wenno inspeksion iti compound ti ahensia.
Nagnegatibo ti nasao nga inspeksion manipud iti aniaman a pampabettak wenno kagawaan ti pampabettak.
Gapu iti daytoy, naipasidong dagiti personnel ti LTO-Baguio iti refresher seknan iti bomb threat protocol ken security measures.
