Inwaragawag ti Land Transportation Office (LTO) nga inikkatna ti driver’s license dagiti dandani sangagasut a motorista a naduktalan a nagpositibo iti panagaramat ti iligal a droga.
Sigun kenni Land Transportation Office chief Assistant Secretary Vigor Mendoza II, kalpasan ti confirmatory test, siam a pulo ket walo a drayber ti pakabuklan a nagpositibo iti drug test.
Napaliiw ti nasao a hepe a kaaduan kadagiti nagpositibo ket dagiti drayber ti provincial buses, nga addaan ti lima pulo ket lima a kaso manipod iti siam a pulo ket walo a nagtaud laeng iti Zamboanga Peninsula.
Pinagyamanan ni Transportation Secretary Vince Dizon ti PDEA gapu iti panangisayangkatda ti inisiatiba idi napalabas a Holy Week.
Maipalagip nga idi napalabas a bulan, kinuna ti nasao nga ahensia a sinuspindirna ti 671 a lisensia dagiti drayber gapu iti pakainaiganda iti “road crasher” ken panagpositiboda iti iligal a droga.
Idi laeng kalman, impakaamo ni Dizon a kalikaguman itan ti gobierno nga agpa-mandatory drug testing amin a drivers ti public utility vehicles (PUV), kalpasan ti agsasaruno nga aksidente iti kalsada itay nabiit a nakatayan ti agarup dinosdosena nga indibidual.
