Nakasagana ti Land Transportation Office (LTO) a gumatang iti kanayunan a breath analyzer para iti kinatalged ti amin a motorista iti pagilian a pilipinas.
Ti nasao a breath analyzers ket para iti full implementation iti Anti-Drunk and Drugged Driving Act 2013.
Babaen iti nasao nga analyzer, nalaklaka a maduktalan ti maysa a motorista nga adda iti impluensa iti arak a nangitunda iti pannakaaksidente dagitoy iti kalsada.
Sigun kenni Land Transportation Office Chief Vigor Mendoza, kasapulan ti adu a breath analyzers tapno epektibo ti nasao nga addang.
Kabayatanna, imbestigaran ti nasao nga ahensia no ania ti napasamak kadagiti 756 a units ti breath analyzers a nailako idi 2015 ken 2017.
Kadagiti 756 a breath analyser unit, kaaduan kadagitoy ti nadadael ken 288 laeng ti mabalin a matarimaan.
Kinuna pay ni Mendoza a napateg ti pannakaiwaras dagiti breath analyzer iti tunggal rehion tapno epektibo ti pannakaipatungpal ti nasao a linteg.
