BAGUIO CITY–Kidkiddawen dagiti opisyales ti barangay Lualhati ti panakibalaet ti lokal a gobierno ti siudad ti Baguio seknan iti isyu iti panakarakrak dagiti kangrunaan a pasilidad ti barangay gapu iti plano a panakailaylayon ti opisina ti Presidente a naipasdek iti masakupan ti barangay.
Iti panakiyuman ti Bombo Radyo kenni Kapitan Julius Ampal ti nasao a barangay, dinakamatna a nagsuratdan iti opisina ni Mayor Benjamin Magalong a mangkidkiddaw iti panakipatangda iti opisina ni Presidente Rodrigo Duterte.
Kinunana a nailanad iti surat ti kiddawda a panakai-award iti barangay iti titulo ti nasao a lote a naipasdekan ti barangay hall, daycare center ken ti basketball court nupay maduktalan a naipasdek dagitoy iti masakupan ti Office of the President.
Imbinglay ti kapitan a marakrak ti intero a paset ti barangay hall ken ti kagudwa a paset ti basketball court no maituloy ti nasao a plano.
Sigun pay kenkuana, idi pay 2017 ti panggep a demolisyon dagiti nasao a pasilidad.
(timek ni Kapitan Julius Ampal ti Lualhati Barangay)
Kabayatana, kweskwestionaran ni Kapitan Ampal ti panangiserbi ti City Buildings and Architecture Office iti notice of violation a nakailanadan ti kaawan iti builiding permit dagiti pasdek.
Inkalintegana a nasken koma nga idi paylaeng ket sinukimat daytoy ti maseknan nga opisina gaputa dagitoy ti mismo a nangplano ken nangipasdek kadagiti pasilidad.
(timek ni Kapitan Julius Ampal ti Lualhati Barangay)
