BAGUIO CITY – Naisagotan iti cash, groceries ken health care items ti nabigbig a Lucky New Year’s Baby ti Baguio City.
Ti maladaga ket nabigbig a ni Raiven Clyde Reopa Agruda nga umuna nga anak da Jessica Reopa, 23 ken Zaldy Agruda, 27, maysa a market delivery boy ken residente ti Slaughterhouse Compound.
Naipasngay ni Baby Agruda iti alas-12:34 iti agsapa ti Enero 1 iti Baguio General Hospital and Medical Center.
Ti Lucky New Year’s Baby ti maudi iti month long Silahis ng Pasko a nangrugi idi December 8 a nakaitampokan dagiti dadduma nga aktibidad kas iti Lucky Christmas Family, Special Day for Special People, Lucky Christmas Baby ken ti TALA Leadership Awards.
Immuna metten a naipaayan iti nagduduma a regalo ti nabigbig a Lucky Christmas Baby ti Baguio City a ni Psalm Francisco a naipasngay iti pasado ala-una ti parbangon ti Christmas Day sadiay Baguio General Hospital and Medical Center.
Ni Baby Psalm ket maikadua nga anak ti porter a ni Wilmer ken ti asawana ken residente dagitoy ti P. Burgos.
Nabigbig met dagiti TALA Achievement Awardees a da retired DepEd-Cordillera director Remedios Taguba, retired traffic policeman Albert Tadeo, artist Salvador Cabrera Jr. ken journalist March Fianza.
