BAGUIO CITY – Impeksa dagiti otoridad ti pakaseknanda kalpasan ti nagsasaruno a panakakemmeg dagiti babbai a maatap a karaman iti transaksion ti iligal a droga.
Kasaruno daytoy ti panangkemmeg dagiti operatiba iti maysa a babai gapu iti panangilakona iti mapapati a shabu iti buy-bust operation a naisayangkat sadiay Santo Tomas Proper, Baguio City idi kalman.
Nabigbig daytoy a ni Shaine Fane Ballesteros Balbuena alyas Tomboy, 26-anyos, tubo ti Tabuk City, Kalinga ken residente ti San Vicente, Baguio City.
Nakumpiskar kenkuana ti maysa a pakete ti maatap a shabu nga agdagsen ti agarup maysa gramo.
Naduktalan a mabaybayadan daytoy a mangideliver iti iligal a droga ken makaaw-awat iti bayad tunggal transaksion.
Iti agdama, sumangsango ti nasao nga indibidual iti kaso a panaglabsing iti Comprehensive Dangerous Drugs Act of 2002.
