Kwinestyunaran ni Ronald Cardema, Chairman iti Duterte Youth Party-list ti maatap a saan a panakaipatungpal ti due process wenno panagdengngeg sakbay a nagpirma ti 215 a kongresista para iti panakaimpeach ni Vice President Sara Duterte iti House of Representatives.
Atapen ni Cardema a saan nga ammo dagiti nagpirma a kongresista ti detalye iti nasao a kaso gapu ta saan a naipaayan iti gundaway a maawagan ti bise presidente tapno madengngeg ti bennegna sakbay a naiyendorso iti Senado.
Mainaig iti dayta, impettengna pay ti umno nga impeachment proceedings a pakairamanan iti panakaawag iti maak-akusaran tapno ilawlawag ti bennegna.
Kabayatanna, maysa met kadagiti nadutukan nga agserbi kas prosecutor a ni Manila 3rd District Rep. Joel Chua ti nangaklon a saanna nga ammo nu siasino ti nagpasimuno iti maikapat nga impeachment complaint kontra kenni Vice President Sara Duterte.
Sigun kenni Chua, nabayagen a naadalda ti maikapat nga impeachment compalaint ngem naaddaan iti caucus dagiti miembro iti Lakas CMD idi Mierkules.
Innayonna nga impaayna a dagus ti suportana iti maikapat a complaint gapu ta sigun kenkuana,amin nga alegasyon a nakalanad iti daytoy ket natalantandan bayat ti taripnong a naangay iti kapada metlaeng nga aldaw.
