BAGUIO CITY – Inkalintegan ti lokal a gobierno ti Baguio ti akusasion seknan iti mishandling wenno saan nga umno a panangipaluspos dagitoy iti dumanon P61 million a pondo a nailatang para iti panagresponde kontra iti COVID-19.
Immuna iti daytoy, kuwenestionaran ti Commission on Audit ti kinakurang dagiti dokumento a naiparang ti siudad a mangsupsuportar iti cash advances para iti operating expenses a nailanad iti report dagitoy idi 2020.
Naduktalanda a saan a naidetalye dagiti project requirements a nakaaramatan dagiti nasao a pondo malaksid pay nga agtultuloy ti cash advances ti siudad nupay awan ti settlements a naaramid kadagiti napalabas a panagalada iti pondo.
Malaksid iti daytoy, nakwestionaran pay ti cash a wagas ti panagbayad kadagiti emergency purchases dagiti medical supplies ken kagawaan a nasken koma a babaen iti cheke.
Gapu iti daytoy, nagbalin a komplikado ti proseso ken naisupadi iti paglintegan ti Bayanihan to Heal as One Act.
Iti met benneg ti lokal a gobierno ti siudad, inlawalawagda a saan nga istriko ti nasurot ti accounting ken auditing rules gapu iti nagduduma a rason.
Kinunada a no nainget a surotenda ti partikular a paglintegan, saan a magatang kadagiti kasapulan a suplay iti naituding a panawen nangruna kadagiti kagawaan a dagos ti pagkasapulan kadagitoy.
Kabayatana, impaganetget pay dagiti auditor a napaay a nangisubmitir ti siudad iti summary report a mangdetalye kadagiti donasion a naawat dagitoy manipud kadagiti nagduduma nga ahensia ti gobierno, dagiti pribado mga indibidual ken grupo.
