Im-imbestigaran ita dagiti kameng ti kapulisan ti napasamak a maatap a motornapping idiay Dontogan, Baguio City idi kalman, August 16, 2026.
Sigun iti report ti kapulisan, ti biktima ket maysa a lalaki nga agtawen iti 25, parcel delivery rider ken residente ti nasao a barangay.
Maatap a napasamak ti motornapping iti maysa a Honda Click iti alas-dose ti parbangon agingga alas-syete ti agsapa iti residential area parking ti nasao a biktima babaen kadagiti saan pay a nabigbig nga indibidual.
Sigun iti biktima, imparadana a nagmalmalem ti motor idi August 15. Innayonna a nakita na pay ti nasao a motor a nakaparada iti asideg ti main door pasado alas dose ti parbangon ti August 16.
Nupay kasta, nadiskubrena laengen a mapukpukaw ti motorna iti alas-syete ti nasao nga aldaw.
Dagosna a sinapul ti motor ngem iti baet ti panagreggetna a panangbirok, saanna latta a nasapulan daytoy.
Gapu iti dayta, nagturong daytoy iti istasyon ti kapulisan tapno agreport.
Dagos met a nangipatungpal ti occular inspection ti kapulisan ken nagreview da kadagiti available a CCTV footages. Nupay kasta, gapu iti saan a nasayaat a paniempo, sumagmamano kadagiti CCTV ti nagmalfunction.