Iyap-apela ita dagiti barangay officials ken residente iti upper quezon hill barangay ti napartak a panakaileppas ti madama a road construction project sadiay copper street iti nasao a barangay.
Sigun kenni Punong Barangay Diane Campos, ti nabuntog a panakaaramid ti nasao a proyekto ket mangituntunda iti parikut kadagiti apektado a residente.
Napitak gamin ti pakaipatpatunglalan ti proyekto ken saan a nasayaat a pagnaan daytoy dagiti apektado nga agindeg iti nasao a disso.
Saan payen a maaramat dagiti dadduma a residente ti luganda agsipud ta napupok dagitoy bayat a dagiti dadduma ken saandan a maidanon ti luganda iti bukodda a balay.
Sigun pay kenni punong barangay campos, namin adun a nabaliwan ti kompletion date ti proyekto.
Naammuan a nangrugi ti nasao a proyekto idi marso 2025, ken ti kaudian a naituding a panakaileppas daytoy ket inton setyembre a-8.
Ti nasao a proyekto ket babaen iti Baguio City district engineering office ti department of public works and highways- cordillera a napunduan iti P7.16-M.
Ginandat met ti Bombo Radyo nga alaen ti dasig ti maseknan a kontraktor ngem saan a naranaan daytoy ti bombo news team iti mismo a project site.
Ngem sigun kadagiti dadduma a trabahador sadiay, ti nabuntog a panakaileppas ti nasao a proyekto ket gapu iti dakes a saaden ti panawen itay kallabes.
Nupay kasta, impetteng ni Campos a rumbeng a partakan ti kontraktor ti nasao a proyekto agsipud ta nasayaat metten ti panawen.//ASP
