Iberipikar iti Commission on Elections-Baguio ti report a naawat daytoy seknan iti maatap a panagkampanya iti maysa a kandidato iti kinakonsehal iti Baguio City.
Iti panakiuman iti Bombo Radyo kenni Atty. John Paul Martin, election officer iti Commission on Elections-Baguio, kinunana a kitaenda pay nu umiso ti naawatda a report seknan iti maatap a panaghouse-to-house campaign ti saanen nainaganan a kandidato.
Maatap a naipatungpal daytoy idi Jueves Santo ken Viernes Santo iti baet a nalawag a naibalakad a maiparit ti panagkampanya kabayatan dagiti nadakamat a nangina nga aldaw.
Nupay kasta, kinuna ni Atty. Martin a masapol nga iberipikarda ti nasao a reklamo gapu ta babaen laeng daytoy iti pablaak iti maysa a social media platform.
Iti kanito a mapaneknekan nga adda iti napasamak a panagkampanya kadagiti nadakamat nga aldaw, kinuna ti opisyal a mabalin a mangipaiyulog dagitoy iti pakaammo iti panaglabsing wenno violation kontra iti maseknan a kandidato.//Bombo Rob Dominguez
