BAGUIO CITY – Inaklon dagiti sumagmamano a residente ti Navy Base ditoy siudad ti Baguio nga adda ti napasamak a panagtukar ti banda kabayatan ti kaadda ti grupo ni PNP Chief Archie Gamboa iti Chief PNP Cottage sadiay Navy Base.
Sigun kadagiti residente iti asideg ti Chief PNP Cottage, nangngegda ti panagpatukar ti maysa a banda iti cottage gaputa kaarubada laeng ti nasao a pasdek.
Kinunada a nangrugi a nangngegda ti tukar iti sardam ti Sabado, August 15 ken nagleppas daytoy iti alas-10:00 ti rabii kagiddan ti naituding a curfew ti siudad.
Dinakamatda nga adda ti nakitada a nagserbi a police escort ti PNP Chief bayat ti panagturongna iti cottage daytoy.
Imbinglayna nga agarup siyam a lugan ti inaramat dagiti police escort malaksid pay kadagiti nakamotorsiklo.
Gapu iti daytoy, saan a naliklikan ti panangbabalawda iti ado nga escort ti opisyal idinto ta nagtaud dagitoy iti National Capital Region a maibilbilang a high-risk area ti COVID-19.
Immuna metten a pinaglibakan ti Baguio City Police Office ken ni Mayor Benjamin Magalong nga adda ti pasken a naisayangkat ken kinunada a private dinner ti naaramid.
