BAGUIO CITY– Ab-abusuen dagiti residente ti Baguio City ti umno a pakaar-aramatan dagiti Malls and Market Schedule (M&MS) Passes ken business permits ita a panawen ti COVID-19 crisis.
Imbutaktak daytoy ni Public Order and Safety Division (POSD) Deputy Chief Daryl Kim Longid iti interview ti Bombo Radyo -Baguio.
Ditoy a kinunana a naduktalanda nga agraraira ditoy siudad dagiti negosyante, partikular iti uneg ti merkado publiko, a mangilaklako kadagiti business permits dagitoy iti online.
Dinakamatna a mismo a naipatulod iti Official Social Media Page ti POSD-Baguio ti screenshot ti transaksion ti maysa a seller ti business permit ken ti kliyente daytoy.
Malaksid iti daytoy, ado met ti nasitsitarda a residente nga agipabpabulod kadagiti M&MS Passes dagitoy kadagiti kaaruba wenno gaggayyemda.
Maipalagip a maar-aramat dagiti business permits ken color-coded a passes tapno makastrek ti maysa nga indibidual iti merkado publiko.
Gapu iti napasamak, dagosa a nakikoordinar ti POSD iti pulisya ken kadagiti lokal a gobierno ti babbarangay tapno ad-adda nga ingetanda ti panagbantay kadagiti dokumento dagiti umili.
Inaklon ni Longid a saan a nakalanad iti paglintegan ti community quarantine ti siudad ti umno a dusa wenno multa dagiti agilaklako iti business permits ken agipabpabulod iti passes tapno laeng makastrek iti merkado publiko ti siyudad.
Kinunana a ti laeng ar-aramiden dagiti otoridad ket ti saan a mangpastrek kadagiti maduktalanda a nang-abuso kadagiti pass ken permit.
