BAGUIO CITY – Im-imbestigaran ita dagiti pulis ti maatap a panakakawtibo ti maysa a balasang sadiay Kalapati Street, Dizon Subdivision, siudad ti Baguio iti alas-dos ti parbangon ti Mayo 6.
Nabigbig daytoy a ni Aprilyn Eyas Agoyos, 30-anyos, ken residente ti nasao a subdivision bayat a ti saan pay a nabigbig a suspek ket nakasuot ti puraw a t-shirt, puraw a kallugong ken nakalugan iti nangisit a van.
Naduktalan iti inisyal nga imbestigasyon ti pulisya a sakbay ti insidente ti maatap a panagkawtibo ket nag-iinom iti arak ti biktima ken dagiti papagayamna sadiay East Quirino Hill.
Kalpasanna ket nagnagnada iti kalsada paawid kadagiti pagtaenganda ngem bayat ti pannagnada ket sadiay a simmardeng ti nakasabatda a van a nagtaud iti direksion ti Kalapati Street.
Rimwar ti maysa a lalaki manipud iti nasao a lugan ken inguyodna ti balasang sakbay a nagdiretso ti lugan iti direksion ti Upper Pinget.
Dagus a naiyuman ti insidente iti Baguio City Police Office – Station 2 ken iti panangtawag dagiti pulis iti cellphone ti balasang ket sinungbatan daytoy ti maysa a lalaki.
Imbaga ti nasao a lalaki nga adda dagitoy sadiay Naguilian, iyawidda metlaeng ti balasang ken awan ti rumbeng a pagdanagan gaputa natalged ti balasang sakbayna nga iniddep ti tawag.
Kinuna pay ti pulisya a saan a nalawag ti plaka ti van ken naudi a nakita iti deppaar ti Pinsao Proper a paturong iti direksion ti Tam-awan Village.
