Kinuwestiyonaran ni House prosecution spokesperson ken Lanao del Sur Rep. Zia Alonto Adiong ti maatap a pro-China ti kampo ni Vice President Sara Duterte.
Sigun kenni Adiong, madlaw dagiti sasao ken takder dagiti Dutertes, manipud iti napalabas nga administrasion agingga iti agdama.
Innayonna nga ad-adda a maitunos ti salaysay dagitoy iti Beijing ngem iti takder ti gobierno ti Pilipinas.
Inkonektar pay ti mammanday-linteg ti isyu iti Gencorp Industries Inc., maysa kadagiti negosyo ti bise president a nailista iti Statement of Assets, Liabilities and Net Worth (SALN) daytoy.
Naduktalan a sigud a pagaammo daytoy kas Timesquare Bee Foods Corp. a kompanya ti maysa a Chinese national.
Sigun pay kenni Adiong, arigna nga adda ti terms of engagement dagitoy iti Chinese government wenno anyaman a Chinese entity.
