BAGUIO CITY – Agtultuloy ti clearing operation nga ipatpatungpal ti pulisya ken militar kadagiti dua a lugar a rinaut dagiti maatap a kameng ti New People’s Army sadiay Mankayan, Benguet idi rabii.
Segun kenni PCI Ronnie Albino, hepe ti Mankayan PNP, nakaawatda iti impormasyon nga adda dagiti maatap a kameng ti NPA a rimmaut sadiay Dam 5 Gate, Tailing Dam, Cabiten, Mankayan.
Kalpasan ti sumagmamano a minutos ket nakaawatda manen iti impormasyon a naraut met laeng ti Chemical and Mineral Laboratory sadiay Cabatuan, Colalo, Mankayan.
Iti panagrespondeda sadiay Colalo ket naduktalanda a napabettakan ti police outpost sadiay, ti maysa a backhoe, ken maysa a floating machine para iti copper.
Iti panakiumanda kadagiti trabahador sadiay ket naamoan a pito nga armado a lallaki ken maysa a babai ti nagturong sadiay a nangisayangkat iti nasao a panagpabettak.
Kabayatanna, kinuna met ti chief security ti Lepanto Mines Division a naaddaan iti rinnupak dagiti rebelde kontra kadagiti personnel ken soldado sadiay nupay nagsublin iti normal ti sitwasyon sadiay.
Nupay kasta, pinabettak met laeng dagiti suspek ti maysa a lime mixing plant ken maysa a bulldozer, ken adda ti nasarakanda a saan a bimtak a bomba a naibitin iti dua a dumptrucks sadiay.
Kabayatanna, kinondinar ti militar ti planado a panagraut dagiti maatap a kameng ti NPA iti nasao a lugar.
Segun kenni Lt. Col. Nicolar Quemado Jr., commander ti 54th Infantry Battalion, ti inaramid dagiti nasao nga NPA ket mangipaspasimudaag a saanda a pabor iti kapia.
Kinunana a pammaneknek daytoy iti panagsanod ti rebelde a grupo iti saritaan-kapia ken nagsublida iti sigud nga aramid dagitoy.
