BAGUIO CITY – Simmuko kadagiti otoridad ti maysa a mapapati a kameng ti New People’s Army (NPA) sadiay Brgy Pantikian, Balbalan, Kalinga idi kanikadua.
Nabigbig daytoy a ni Joseph Masadao alyas Ronald, agtawen iti 53, baro ken residente ti Sitio Ubel, Gawaan, Balbalan,Kalinga.
Sigun kadagiti otoridad, ti nasao nga indibidual ket kameng ti Milisyang Bayan (MB) nga adda iti sidong ti Marcial Dagay Command ti NPA nga agdakdakiwas sadiay Kalinga.
Kinuna ti Police Regional Office Cordillera a simmuko ni Masadao kadagiti kameng ti Balbalan Municipal Police Station ken iti 50th Infantry Batallion ti Philippine Army kalpasan a nagsagrap daytoy iti dunor gapu iti nargaay a tunnel iti maysa nga usok sadiay Kalinga.
Mabambantayan iti pagagasan ti nasao nga indibidual ken manarimaan ti pannakaiproseso dagiti benepisyo a maawat daytoy.
Namnamaen dagiti otoridad a kalpasan ti isusuko ni Masadao ket ad-adu pay a kameng dagiti rebelde a grupo ti agsubli wenno sumuko iti gobierno.
