BAGUIO CITY – Impasigurado ti Department of Environment and Natural Resources (DENR) – Cordillera nga ipasukimatda iti Provincial Environment and Natural Resources Office ti Apayao ti reklamo nga adda ti maysa a kapitan sadiay munisipyo ti Luna a mangidadaulo iti panagpukan iti kayo sadiay.
Insungbat daytoy ni DENR-Cordillera Assistant Regional Director for Technical Services Forester Augusto Lagon mainaig iti surat a naawat ti Bombo Radyo Baguio mainaig iti nasao nga alegasyon.
Nailanad iti surat ti maysa a concerned citizen manipud Apayao ti maatap a panangidaulo ti maysa a kapitan sadiay iti iligal a panagpukan iti kayo ken awan pulos ti aksion nga impatpatungpal dagiti maseknan nga opisina.
Sigun kenni Lagon, sukimatenda ti nasao a disso a mairekreklamo a pakaipatpatungpalan ti iligal a panagpukan, kaduada dagiti maseknan nga opisina iti sidong ti ahensia.
Imbalakadna ti panagturong dagiti agrekreklamo iti opisina ti DENR-Cordillera para iti panakaipila ti pormal a reklamo kontra kadagiti agpukpukan.
Innayonna a no agbuteng dagiti maseknan nga umili ket agturongda laengen iti lokal a gobyerno iti munisipyoda wenno iti pulisya ken iti militar tapnu sadiayda nga agreklamo.
Naamuan kenkuana a kadawyan a mapukpukan sadiay Apayao ket dagiti nara para iti panakaipasdek dagiti babbalay sadiay.
