BAGUIO CITY – Mairekreklamo ti maatap a panakibingay ti DepEd Tuba District iti hardship benefit dagiti mannursuro sadiay.
Iti reklamo a naidanon iti Bombo Radyo, naamoan a kalpasan a maawat dagiti sumagmamano a mannursuro sadiay ti hardship benefit wenno allowance dagitoy ket agkolektar ti Tuba District iti sag-P300 manipud kadagitoy.
Kinunana nga uray dagiti kabarbaro a teachers ket nasken a maksayan iti P300 ti hardship benefit dagitoy tapnu laeng saanda a maaddaan iti saan a napintas iti rekord iti nasao a distrito.
Innayonna nga awan ti maipapaay a resibo manipud iti district office isut gapuna a saan nga ammo dagiti nakolektaran a mannursuro ti pakaar-aramatan ti makolkolektar a kwarta kadagitoy.
Gapu iti daytoy, kidkiddawenda ti panakaisardeng ti nasao a sistema gaputa nabayagen nga agkolkolektar ti Tuba District iti P300 manipud iti hardship allowance dagiti mannursuro sadiay.
Nainget met a pinaglibakan ni Tuba Public Schools District Supervisor William Abance dagiti nasao nga alegasyon.
Kinunana a saanda nga ipilpilit ken saanda nga agkolkolektar iti kwarta manipud kadagiti head teachers, principals ken kadagiti mismo a mannursuro dagitoy.
Gapu iti daytoy, imbalakadna kadagiti agrekreklamo nga agturong laeng dagitoy iti opisinana tapnu bigbigen ken amuenda no asino ti iligal nga agkolkolektar ti nasao a kwarta.
Impanamnama met ti DepEd Benguet nga imbestigaranda ti nasao a reklamo kontra iti Tuba District.
Segun kenni Schools Division Superintendent Marie Carolyn Verano, idauluan ti district chief ti imbestigasyon mainaig iti nasao a reklamo.
Impettengna nga iligal ti panagkolektar iti kwatra manipud kadagiti mannursuro nangruna no saan a maipalawag ti pakaar-aramatan ti kwarta.
Naamuan a ti hardship allowance ket maipapaay kadagiti napili a mannursuro a nakadestino kadagiti adayo ken napeggad a lugar wenno pagadalan ken depende ti gatad iti kasasaad ti lugar a pagisursurwan dagiti maseknan a mannursuro.
