BAGUIO CITY – Panggep dagiti nagannak dagiti estudyante ti Camp 6 Elementary School sadiay Tuba, Benguet nga agipila iti reklamo kontra iti maysa a manursuro a maatap a nangdangran kadagiti estudyante daytoy.
Segun iti maysa a nagannak, saan laeng a ti anakna ti imbabad iti init ti nasao a manursuro nu di ket agramanen dagiti kaklase daytoy.
Kinunana nga inaklon metlaeng dagiti kaklase ti anak daytoy nga aminda ket mababaut ti uloda babaen iti libro iti kanito nga adda ti pagbiddutan dagitoy.
Immunan a naidanon iti Bombo Radyo ti nasao a reklamo, ken mapapati a maysa pay nga estudyante ti natalimudaw kalpasan a naibabad dagitoy iti init.
Kabayatanna, impetteng ti principal ti pagadalan nga awan ti nakitana a nakabilag wenno nakababad iti init nga estudyante iti kampus dagitoy.
Mainaig pay laeng daytoy iti reklamo ti sumagmamano a nagannak kontra iti panangibabad iti init ti maysa a manursuro sadiay kadagiti estudyante daytoy.
Nupay kasta, impanamnama ni school prinicipal Robert Tican nga imbestigaranda ti maatap a panangbaot ti manursuro iti ulo dagiti estudyante daytoy babaen iti libro.
Kinunana nga iti kanito a mapaneknekan ti nasao nga alegasyon ket kasapulan a maipaayan iti kaskenan nga aksyon tapno saanen a maulit pay.
Kabayatanna, ginuyuguy met ti principal dagiti nagannak nga addaan ti pakaseknan iti nasao a pagadalan a makiumanda kenkuana gaputa nakasagana daytoy a tumulong ken mangsungbat kadagiti saludsod dagitoy.
