BAGUIO CITY–Pagan-annaden ita ti pulisya dagiti umili iti probinsia ti Benguet, partikular sadiay La Trinidad manipud iti maibagbaga a grupo nga United States Allied Freedom Fighters of the East (USAFFE).
Sigun kenni PCI Benson Macli-ing, hepe ti La Trinidad PNP, nakaawat ni Mayor Romeo Salda iti surat manipud iti maysa nga indibidual nga agkidkiddaw iti pammalubos para iti isayangkat ti grupoda a trainings ken seminars seknan iti USAFFE.
Kinunana a kiniddaw met laeng ti nasao nga indibidual ti pammalubos ti mayor para iti ipatungpal dagitoy a panag-recruit kadagiti kayatna a kumappeng iti nasao a grupo.
Nupay kasta, kinunana a saan daytoy a pinatgan ni Mayor Salda ken imbilin ti mayor ti panangberipikarda iti nasao a grupo.
Sigun kenkuana, naduktalanda a saan a rehistrado ken awanan iti permit ti nasao a grupo nga idadauluan ti maysa a managan Elly Velez Pamatong.
Gapu iti daytoy, iyap-apela ni PCI Macli-ing a no adda dagiti mangipatungpal ti aniaman a recruitment, seminar ken training seknan iti maibagbaga a grupo nga USAFFE ket dagus daytoy nga ireport ti publiko kadagiti pulis para iti napartak nga aksion ken ti panakaipila ti kaskenan a kaso nga illegal recruitment kontra iti grupo.
Naamuan nga indeklara ti COMELEC a nuisance candidate ni Pamatong iti kina-presidente idi 2003.