BAGUIO CITY – Inaklon ti Regional Communications Officer ti Social Security System (SSS) – North Luzon 1 Division nga adda ti panakataktak wenno mabaybayagan ti panakaiproseso ti benipisyo dagiti miembro ti SSS ita a panawen.
Iti interview ti Bombo Radyo Baguio, inkalintegan ni Christian Andrew Rillorta a daytoy ket gapu kadagiti panagbaliw iti pagalagadan a masursurot kadagiti opisina ti SSS gapu iti agdama a pandemya.
Dinakamatna a gaputa 70 percent kadagiti empleyado ti SSS ti napalubusan nga agreport iti opisina, kaipapanan daytoy a 13 laeng manipud iti 32 nga empleyado ti SSS-Baguio ti sumsumrek sadiay ken magudwada pay iti tallo a dibisyon bayat a dagiti dadduma ket naka-work from home.
Innayonna nga adda metlaeng ti cut-off time iti panaglukat ti SSS tapnu malimitaran ti panagserrek dagiti tattao iti uneg ti opisina nupay alas sais paylaeng ti agsapa ket nakalukaten dagitoy a mangakomodar kadagiti kliyenteda.
Sigun pay kenkuana, epektibo ita ti number coding iti panangakomodar ti SSS kadagiti miembro ken ti aldaw a mabalin a pagturongan iti opisina ti SSS ket agbasar iti maudi a numero iti SSS Number.
