BAGUIO CITY – Nakemmeg ti mabigbigbig a drug queen ti siudad ti Baguio kalpasan a natiliwan nga agilaklako kadagiti iligal a droga kadagiti agtutubo sadiay San Carlos Heights, Irisan, Baguio City idi kalman.
Nabigbig daytoy a ni Anna-Lyn Bugarin Lee, 48-anyos, balasang, sigud nga OFW, tubo ti Bontoc, Mt. Province ken residente iti nasao a lugar.
Iti insayangkat nga operasion dagiti nagtitipon a pwersa dagiti otoridad, nakumpiskar kenni Lee ti agarup nasurok 7.5 grams ti maatap a shabu nga aggatad ti P51,000.
Naaktuwan metlaeng iti operasion dagiti lima nga agtutubo iti balay ni Lee nga agserserbi a drug den bayat nga agar-aramat dagitoy iti iligal a droga.
Nabigbig dagitoy a da Jeanne Tabil, 19-anyos, residente ti La Trinidad, Benguet; John Michael Abalos, 22-anyos, tubo ti Santa Barbara, Pangasinan; Rodel Balmores, 19-anyos, tubo ti Cauayan, Isabela; Mark Roan Anthony Reyes, 19-anyos, tubo ti Manuel, Tarlac ken ni Sherilyn Viray, 18-anyos, residente ti Baguio City.
Nakumpiskar met manipud kadakuada ti bust-money nga aggatad ti P16,000, lima a cellphone ken nagduduma a drug paraphernalia.
Naduktalan pay iti imbestigasion a nabayagen a negosyo ni Lee ti agilako iti iligal a droga nangruna kadagiti agtutubo ken naipasa kenkuana ti nasao a drug dealing business manipud iti pimmusay a kabsatna.
Naituding a sumango dagiti nakemmeg iti kaso a panaglabsing iti RA 9165 wenno ti Comprehensive Dangerous Drugs Act of 2002.
