Naimatangan dagiti kameng ti Armed Forces of the Philippines (AFP) ti China Coast Guard 5901, ti kadakkelan a barko a maaw-awagan a “The Monster” iti asideg ti BRP Sierra Madre idiay Ayungin Shoal.
Sigun iti nasao nga ahensia, paturong daytoy iti nasao a baybay ken posible a paset ti nalawlawa nga “intrusive” a panagpatrolia nga addaan panggep a serreken ti baybay a paset ti economic zone (EEZ) iti Pilipinas.
Impaganetget ti Armed Forces of the Philippines a ti presensia dagiti barko ti China Coast Guard ket iligal, “coercive”, ken maisupadi iti espiritu a mangtaginayon iti talna ken kinatalged iti rehion.
Nupay kasta, impasigurado dagiti militar ti Pilipinas nga agtultuloy ti panagridam dagitoy ken natibker iti panangipatungpal kadagiti international maritime laws, partikular ti United Nations Convention on the Law of the Sea (UNCLOS).
Kiddawda ti nasao nga ahensia iti dadduma a pagilian a rumbeng a maobserbaran ti linteg ken liklikanda ti addang a mabalin a mangpakaro ti tension iti West Philippine Sea.
