BAGUIO CITY – Naibalud ti maysa a babae a mabigbigbig nga agtatakaw kalpasan a nakemmeg daytoy gapu iti panagtakawna iti selpon ti maysa a baro iti deppaar ti Block Market partikular iti Sari-sari Section sadiay Upper Magsaysay Avenue, Baguio City idi kanikadua.
Nabigbig ti suspek a ni Alexandra Tubosa Domingo alyas Sandra Tubosa Domingo, 20-anyos, baro, awanan trabaho ken residente ti Santo Rosario, Campo Sioco, Baguio City bayat a nabigbig ti biktima a ni Silverio Tabor Calderon, 19-anyos ken residente ti Purok 1, Kias, Baguio City.
Maibasar iti report, manarimaan ti anti-pickpocket operation dagiti pulis iti nasao a disso idi nakitada ti suspek a maysa a mabigbigbig nga agtatakaw a mangsursurot iti biktima.
Naaktuanda ti panangilukat ti suspek iti backpack ti biktima ken ti panangala daytoy iti maysa a banag iti nasao a bag a nangitunda tapnu kemmegenda ti babae.
Impasukimatda met iti biktima ti backpack daytoy ken sadiay a kinumpirmar ti biktima a mapukpukaw ti selpon daytoy.
Inturong dagiti pulis ti biktima ken ti suspek iti Presinto Uno ken sadiay nga inruar ti suspek ti tinakawna a selpon ti biktima nga inlemmengna iti siketna.
Imbilin met ni Inquest Prosecutor Merly Espinosa ti panakaibalud ti suspek iti Baguio City Jail.
