Upang tugunan ang kakulangan ng mga punong-guro o school principal sa bansa, plano ng Department of Education (DepEd) na magtalaga ng mahigit 15,000 na guro bilang school principal sa taong 2025.
Batay kasi sa ulat ng Second Congressional Commission on Education (Edcom 2) noong Enero, 24,916 na paaralan sa bansa ay walang nakatalagang punong-guro.
Sa halip, pinamumunuan lamang ang mga ito ng head teacher, teacher-in-charge, o officer-in-charge, na siyang naglilimita sa kanilang pag-access sa mga kinakailangang mapagkukunan.
Mga Hakbang ng DepEd
Ayon sa DepEd, magpapalabas ito ng mga panuntunan upang mapadali ang pagtatalaga ng mga kwalipikadong guro bilang school principal. Kasama sa mga hakbang nito ang:
✔Pagtatalaga ng 7,916 na guro na pumasa sa National Qualifying Examination for School Heads (NQESH) upang punan ang bakanteng posisyon.
✔ Pag-reclassify ng 14,751 na head teachers at pag-retitle ng 954 head teachers at assistant school principals upang maging School Principal I.
✔ pag-prayoridad sa mga acting school heads para sa mas mabilis na promosyon bilang punong-guro.
Bukod dito, sisimulan ng DepEd sa 2025 ang pagbabago sa NQESH upang higit na masukat ang kakayahan ng mga nais maging punong-guro.
Idedesisyon na rin ito sa antas ng rehiyon upang mapabilis ang proseso.
Mas Maraming Punong-Guro sa 2026Target din ng DepEd na magpatupad ng 1:1 ratio ng school principal sa bawat paaralan sa pamamagitan ng School Organizational Structure and Staffing Standards (SOSSS) pagsapit ng 2026.
Bilang bahagi nito, magdaragdag ng 5,870 na posisyon para sa School Principal I.
Ayon kay Department of Education Secretary Sonny Angara, malaking hamon ang kakulangan ng school principal sa bansa.
Ang hakbang ng DepEd ay isang mahalagang solusyon upang matiyak na ang bawat paaralan sa bansa ay may maayos na pamamahala.
Sa pamamagitan ng mga bagong patakaran at mas mabilis na promosyon ng mga guro bilang punong-guro, inaasahang mas magiging epektibo ang pamamahala sa mga pampublikong paaralan sa hinaharap.
