BAGUIO CITY – Isagsagot ti lokal a gobyerno ti Baguio daytoy nga aldaw kas pananglagip kadagiti ginasgasut a pimmusay iti July 16, 1990 killer earthquake nga addaan ti napinget a kararag nga awanen ti kapada a kalamidad a mapasamak iti siudad, iti pagilian ken iti sangalubongan.
Kagiddan daytoy ti maika-31 a tawen nga anibersaryo ti nasao a trahedya a nakapukawan ti adu a biag ken nakadadaelan ti adu a sanikua.
Maipalagip a maysa ti Baguio City kadagiti siudad a nakaro a nadadael iti panagdayeg ti 7.8 magnitude a gingined.
Sigun kenni Mayor Benjamin Magalong, nasken nga agserbi ti nasao a kapadasan kas giya iti panangipangruna iti disaster preparedness ken environment preservation.
Kinunana nga agserserbi ti nasao a didigra nga inspirasyon iti panagrekober manipud iti aniaman a panagrigat iti biag.
Kabayatanna, mangisaysayangkat ti City Disaster Risk Reduction and Management Council (CDRRMC) ti Baguio iti bloodletting activity tunggal aldaw ti Martes iti entero a bulan ti Hulyo kas paset ti pananglagipda iti 1990 killer earthquake.
Iti interview ti Bombo Radyo Baguio, imbinglay ni Antonette Anaban, dadaulo ti CDRRMC a ti umuna a plano ket mangisayangkatda ti earthquake drill ita nga aldaw ngem gapu iti limitasyon iti face-to-face ket insukatda ti bloodletting activity.
Kinunana a maitunos metlaeng daytoy iti panangrambak ti siudad iti National Disaster Resilience Month 2021 ita a bulan.
Sigun kenkuana, ita a panawen ken iti aniaman a kalamidad wenno didigra ket adu ti agkasapulan ti dara isut gapuna a maysa daytoy a pagsagsaganaanda.
Innayonna a saan a kayat ti siudad nga agsubli iti nagbalin a sitwasyon idi napasamak ti killer quake idi 1990 isut gapuna nga agtultuloy ti panagsagana ti CDRRMC tapnu no adda man dagiti maapektaran iti kalamidad ket maksayan ti agbalin nga epekto daytoy.
Dinakamatna nga isagsaganadan ti Public Service Continuity Plan ti Baguio a pakailanadan dagiti istratehiya nga ipatungpal ti lokal a gobyerno no adda ti sumangbay a didigra tapnu maituloy latta ti panangitedda ti serbisyo publiko kadagiti umili.
