BAGUIO CITY – Nairekord ti City Health Services Office ti maika-dua a kaso ti mpox iti Baguio City.
Iti social media page ti CHSO, ti maika-dua a kaso ket 22-anyos a lalaki, residente ti siudad.
Awanan daytoy iti travel history paruar iti pagilian ngem adda ti naka-close contact daytoy, dua a lawas sakbay a nakarikna iti sintomas.
Nangrugi ti sintomas iti flu-like symptoms kas iti panagkapsot ti bagi, panagtigerger, ken pannakabannog.
Kasaruno iti daytoy, rimwar metlaeng ti rashes iti ima, rupa ken dadduma pay a paset ti bagi ti pasyente.
Nagpakonsulta ti pasyente iti pribado nga ospital nu sadino naalaan iti sample.
Naiturong ti sample iti Research Institute for Tropical Medicine (RITM) ket ditoy a nakumpirmar a positibo iti monkeypox viral DNA babaen iti PCR test.
Ti impeksyon ket gapu metlaeng iti Clade II type, saan unay a nakaro, a kas iti napasaran ti immuna a kaso ti mpox iti Baguio City.
Nakaruar ti pasyente manipud iti ospital idi Enero 21 ken diretso a naipasidong iti home isolation.
Nabigbig metten dagiti dua a nakapulapol daytoy ken iti agdama ket asymptomatic dagitoy ngem nairekomendar ti panag-quarantine dagitoy.
Agleppas ti quarantine period ti maysa kadagiti close contact inton Pebrero 6 bayat a ti maysa ket inton Pebrero 24.
Maipalagip nga itay nabiit ket naduktalan ti umuna a kaso ti Mpox iti Baguio City nu sadino nakompletonan ti home isolation idi Enero 17 ken naimbaganen.
Immuna a kinuna ti Health Department a ti Mpox ket maysa a viral disease a mabalin nga agtaud iti ayup ken maiyakar iti tao wenno agtaud mismo iti tao ken maiyakar iti dadduma a tao.
Maiyakar daytoy nu adda ti mapasamak a close physical contact wenno skin-to-skin contact kas ti panang-arakup, panang-ungo (kiss) wenno sexual contact kadagiti nagpositibo.
Karaman kadagiti sintomas ti monkeypox ket rashes, fever, headache, muscle aches, ken swollen lymph nodes.
