BAGUIO CITY– Marugian ita nga aldaw ti Lunes ti panakaiwaras ti maikadwa a dupag ti Social Amelioration Program (SAP) ti Department of Social Welfare and Development (DSWD)-Cordillera sadiay La Trinidad, Benguet.
Kinumpirmar daytoy ni La Trinidad Mayor Romeo Salda iti interview ti Bombo Radyo.
Sigun kenkuana, impaabiso ni DSWD-CAR regional director Leo Quintilla ti schedule ti La Trinidad a mangawat iti 2nd tranche ti SAP no sadino mangrugi daytoy inton bigat ken maituloy inton Hulyo 28, Martes ken agleppas inton Hulyo 29, Miyerkules.
Inlawlawagna a pakabuklan a 19,712 ti benepisyaryo ti SAP sadiay La Trinidad no sadino 4, 970 kadagitoy ti agpay-out iti cash bayat a 14, 708 ti mangawat iti benepisyo babaen iti G-Cash.
Impettengna a dagiti paylaeng mangawat iti cash ti SAP ti maipaayan iti serbisyo iti tallo nga aldaw a panakaipatungpal ti programa sadiay La Trinidad bayat nga urayen pay dagiti nasurok 14,000 a benepisyaryo ti abiso ti DSWD para iti G-Cash pay-out dagitoy.
Innayon pay ti mayor nga ennem a baranggay ti naka-schedule inton bigat, bayat a sag-lima a barangay ti naka-schedule a mangawat iti benepisyo inton Martes ken inton Miyerkules.
