BAGUIO CITY – Isayangkat manen ti Police Regional Offcie Cordillera (PROCOR) ti maikadua a ‘Bike Challenge’ a napauluan ti “Padyak Tungo sa Pagbabago 2017” inton December 9, aldaw ti Sabado.
Sigun kenni PROCOR information officer PCI Carol Lacuata, amin a maur-or a kwarta ket maipaay kadagiti nagduduma a partner institutions ti PROCOR a mangipatpatungpal iti community-based rehabilitation program para kadagiti drug surrenderees iti rehion.
Kinunana a ti kwarta a naur-or iti immuna a Padyak Challenge ket naipaay iti Baguio General Hospital ken iti Ifugao Reflection Camp.
Dinakamatna a ti ‘Bike Challenge’ ket addaan iti dua a kategorya ken dagitoy ket ti kategorya para kadagiti pulis ken ti kategorya para kadagiti sibilyan.
Mangrugi ti pasalip iti alas singko ti agsapa iti sangwanan ti La Trinidad PNP ken agleppas daytoy iti regional headquarter ti PROCOR sadiay Campa Bado Dangwa kalpasan ti panagbisekleta dagiti partisipantes iti 20 a kilometro a ruta.
Mainaig iti daytoy, im-imbitaran ti PROCOR dagiti amin nga interesado nga amateur bikers iti rehion, dagiti agtawen iti 18 tapnu makipaset ken tumulongda iti nasao nga aktibidad para kadagiti drug surrenderees iti rehion.
Innayon ni Lacuata a P500 ti registration fee ken karaman iti daytoy ti biking shirt, race paraphernalia ken breakfast ti partisipante.
