BAGUIO CITY – Isaksakad ita ti Regional Development Council (RDC) ken National Economic and Development Authority (NEDA) – Cordillera ti panakaisayangkat ti maikadua a rikos ti forum ken panagtataripnong dagiti kongresista iti rehion Cordillera ken Mindanao.
Sigun kenni NEDA-Cordillera regional director Milagros Rimando, maisayangkat ti maikadua a panagtataripnong dagiti kongresista iti umuna a lawas ti Pebrero para iti panakaisakad ti Bangsamoro Basic Law ken ti Autonomous Region of the Cordillera.
Kinunana a babaen iti daytoy ket ad-adda a suportaran dagiti mammanday linteg ti matartarigagayan nga otonomiya iti Cordillera.
Dinakamatna met a manamnama nga ipila da Senate President Aquilino “Koko” Pimentel III ken Senator Miguel Zubiri ti bersyon dagitoy iti Senado para iti otonomiya iti rehion.
Innayonna a kalpasan ti panagtataripnong dagiti mammanday-linteg ket agsubli manen ti RDC ken NEDA iti kampanya dagitoy a mangipakaawat iti linaon ti otonomiya nangruna kadagiti agtutubo iti rehion.
