BAGUIO CITY – Nasarakan ti maysa a bangkay ti lalaki iti rangkis iti nagbeddengan ti San Pascual, Tuba, Benguet ken Tubao, La Union idi malem kalman.
Iti panakiyuman ti Bombo Radyo kenni PMaj. Dominador de Guzman, dadaulo ti Tuba Municipal Police Station, kinunana a nasarakan ti bangkay iti 15 a metro ti kaunegna a rangkis iti igid ti kalsada.
Mapattapatta nga agtawen ti lalaki iti 30-35, nakuttong, nakasuot iti gray sweatshirt, yellow underwear ken blue maong pants malaksid nga addaan daytoy iti adaan iti tattoo iti ima.
Sigun kenkuana, nabungon iti masking tape ti ulo ti bangkay ken adda sugat ti barukong daytoy.
Naiturong metten iti Benguet Funeral Homes ti nasao a bankay.
Daytoyen ti maikapat a bangkay a nasarakan iti deppaar ti Tuba, Benguet ita a tawen.
Gapu iti daytoy, umap-apela ti pulisya kadagiti mapukpukawan iti kabagian tapnu apanda laeng iti istasyon dagitoy sadiay Tuba para iti posible a panakabigbig dagiti nasarakan a bangkay sadiay.
