BAGUIO CITY – Dinayaw ti lokal a gobierno ti La Trinidad, Benguet dagiti coffee growers iti inisyatibo dagitoy a mangrambak iti Coffee Festival ita tawen.
Maipalagip a ti laeng La Triniad ti kakaisuna a munisipyo ti Benguet nga addaan iti nasao nga festibidad.
Itay agsapa, pormal a nailukat ti maikapat a Coffee Festival nga addaan iti tema a “Seng-aw ni Kape,tunos ni Umidi”.
Naangay ti programa iti Municipal Rizal Park a pinasetan dagiti nagduduma nga ahensia ken organisasyon.
Napadayawan pay dagiti asosasyon ti coffee growers iti panag-organisada iti festibidad a tumulong a mangital-o iti coffee industry ken mangpapigsa ti turismo ti La Trinidad.
Impanamnama met dagiti dadaulo ti nasao nga ahensia a tumulongda kadagiti kasapulan dagiti coffee associations tapnu mapapintas ken mapapigsa pay ti produksion ti kape iti lokalidad.
Maipalagip a dua a tawen a saan a narambakan ti festibidad gapu iti pandemya.
Iti agdama, napagbalin daytoy a coffee week tapnu malimitaran dagiti aktibidad a maisayangkat no sadino maipatungpal inton bigat ti Coffee Forum iti Office of the Municipal Agriculturist a pakaibinglayan dagiti panagadal ken best practices iti panagmula ti kape kasta met a maitampok ti Search for Best Coffee iti maikatlo nga aldaw ti festibidad.
Agleppas ti nasao nga event babaen it awarding and recognition program inton December 11, 2021.
