Nakapokus ti atensyon ti Criminal Investigation and Detection Group (CIDG) iti panang-arestar iti nabatbati a suspek iti pammapatay iti daydi Mutya ng Pilipinas-Pampanga 2024 candidate a ni Geneva Lopez ken ti fiance daytoy a ni Yitshak Cohen.
Daytoy ket kalpasan a balligi a nakemmeg ti maikapat a suspek ita a bulan ti Marso sadiay Barangay Care, Tarlac City.
Sigun iti Criminal Investigation and Detection Group (CIDG), nabigbig ti suspek kas “Jay” ken naarestar daytoy babaen iti warrant arrest nga impaulog ti Regional Trial Court (RTC) Branch 109 ti Capas, Tarlac.
Ni Jay ket nabigbig ti Criminal Investigation and Detection Group (CIDG) kas Most Wanted Person iti regional Level iti Central Luzon.
Maipalagip a nadiskobre ti bagi dagiti biktima idi Hulyo sais idi napalabas a tawen sadiay Barangay Sta. Lucia, Capas, Tarlac.
Iti agdama, al-allukoyen dagiti otoridad ti nabatbati a suspek a sumuko daytoy gapu ta saanda a sumardeng iti panangbirok kenkuana agingga a maipaay ti hustisya iti pamilya dagiti biktima.
