BAGUIO CITY- Inserbi ti pulisya ti maikatlo nga stoppage order iti maseknan nga indibidual sadiay Itogon, Benguet mainaig iti mapapati nga iligal a panagminas daytoy.
Sigun kenni PCI Eugene Raymundo, hepe ti Itogon PNP, ti dua nga immuna nga stoppage order a naiserbi iti nasao nga indibidual ket impaulog ni Mayor Victorio Palangdan ken ti Mines and Geosciences Bureau (MGB)-Cordillera.
Kinunana a ti stoppage order ket kontra iti managan Mesio Dasi gapu iti reklamo ti managan William Galunza.
Nailanad iti stoppage order a mapapati nga iligal nga agminminas ni Dasi iti lote ni Galunza sadiay Libo-ong, Poblacion, Itogon, Benguet.
Naamoan nga idi napalabas a March 20 ket nangipila iti reklamo ni Galunza iti Barangay Poblacion kalpasan a napaay ni Dasi a mangtungpal iti kari daytoy nga isardengna ti agminas iti lote ni Galunza.
Dinakamat met ni PCI Raymundo nga insardeng ni Dasi ti panagminas daytoy iti nasao a lote.
Nupay kasta, impanamnamana ti agtultuloy a panangwanawanda sadiay tapnu maipanamnama a suruten ni Dasi ti napagtungtungan dagitoy.
