Agtultuloy latta ti panagngato ti bilang ti kaso ti dengue idiay Atok, Benguet.
Iti interview ti Bombo Radyo kenni Atok Mayor Franklin Smith, kinunana a manipod iti 92 a bilang a nailista ti Municipal Health Office, ngimmato daytoy ti 109 ita a bulan.
Iti baet ti panagngato ti kaso, kinuna ni Mayor Smith a saan latta nga agsarsardeng dagiti maseknan nga opisina ti panangipaayda ti Information Education Campaign kadagiti masakupanda a babbalay iti nasao a munisipyu.
Sigun kenkuana, saan laeng a ti “4’oclock habbit” ti ar-aramiden dagitoy nu diket kasta metten ti panangiyunay-unayda iti panagdalus ti arubayan iti inaldaw.
Maibasar iti rekord ti Municipal Health Office, awan ti nairekordda a pimmusay gapu paylaeng iti dengue.
Dakkel ti panagyaman ni Mayor Smith kadagiti barangay health workers gapu iti agtultuloy a panagtrabahoda tapno bummaba ti kaso ti dengue iti nasao a munisipyu.
Kabayatanna, tapno maliklikan ti panagsakit nga itunda ti dengue, impalagip ni Atok Mayor Smith iti publiko ti panagkawes ti attidog a bado, panagusar ti lotion kontra kadagiti lamok, ken pannangan iti nasustansia a makan kas ti nateng ken prutas tapno ad-adda a pumigsa ti resistensia kontra kadagiti sakit.
