BAGUIO CITY – Linawlawagan ti 54th Infantry Battalion, Philippine Army nga awan ti pakainaiganda iti panakapapatay ti police major sadiay Bontoc, Mt. Province.
Mainaig pay laeng daytoy iti agwarwaras a text messages nga adda pakainaigan ti soldado a managan iti Gesser Bucad Lumines iti panakapapatay ni PCI Benjamin Challoy a dadaulo ti Highway Patrol Group-Mt. Province.
Segun kenni Lt. Col. Nicolas Quemado Jr., dadaulo ti 54th IB, ni Lumines a maysa kadagiti kangrunaan a suspek iti panakapapatay ni Challoy ket awan ti koneksyonna iti 54th IB wenno iti anyaman a unit ti 5th Infantry Division.
Kinunana nga adda ti sigud a soldado nga agnagan iti Gesser Bucad Lumines a manipud Bananao, Paracelis, Mt. Province a naikkat iti serbisyo idi Hunyo 1, 2013 gapu iti imoralidad.
Immapela met ti opisyal kadagiti residente ti probinsya a saanda nga agiwarwaras iti biddut nga impormasyon a mangikonkonektar iti militar iti panakapapatay ni Challoy.
Impanamnamada met a nakasagana ti unit dagitoy a tumulong iti panakakemmeg dagiti suspek a nangpapatay iti nasao a police major.
