Mamati dagiti mangsupsuporta kenni Benguet Congressman-elect Eric Go Yap a ti timing dagiti maipilpila a disqualification case kontra kenkuana ket nairanta tapno maitantan ti panakiproklamana wenno tapno saanen daytoy a maiproklama pay.
Iti panakiuman iti Bombo Radyo kenni Gary Paul Abela, lead convenor iti Proclaim Cong.Yap Now Movement, nalawag a dagiti maipilpila a kaso ket nairanta tapno maitantan ti panakaiproklama ni Yap – banag a panggepda a lapdan gapu ta patienda a saan a patas daytoy iti benneg dagiti agarop 144,000 a nangibotos kenkuana.
Sigun kenni Abela, saanda a kidkiddawen ti outright dismissal dagiti kaso nu di ket kayatda laeng a maiproklama ti nabutusan a kongresista tapno makatugaw daytoy iti pwesto inton ngudo iti Hunyo.
Innayon ti lead convenor a bigbigbigenda ti karbengan dagiti petitioner ngem impettengna a kasapulan metlaeng a mabigbig ti karbengan ti kaadwan a nangpili kenni Yap nga agbalin a congressman iti Benguet.
Maipalagip nga idi laeng May 23, naipila ti maikalima a disqualification case kontra kenni Yap nu sadino, ti isyu iti dytiy ket ti citizenship ti nasao a kongresista.
Immuna metten a naipila dagiti daduma pay a disqualification case nga adda met pakainaiganna iti maatap a panaglabsing ni Yap iti COMELEC Resolution 11086, Sec. 8 in relation to Fair Election Act, R.A. 9006, Sec.13, ken ti maatap a vote buying.
Mainaig iti dayta, makidkiddaw met kadagiti mangipatpatungpal iti maatap a taktika a panunutenda ti maituntunda daytoy a panakagudwa dagiti umili iti Benguet.
Impetteng ti nasao a lead covenor nga ipaturay koma itan nga ag-heal wenno agmove-on ti nasao a probinsya tapno saan a mataktak ti agtultuloy koma panakaipaay iti tulong.//Bombo Rob Dominguez
