BAGUIO CITY – Inserbi dagiti otoridad ti stoppage order iti operasyon ti mairekreklamo a pagtagilakuan ti chicken dung sadiay Tili, Shilan, La Trinidad, Benguet.
Immuna iti daytoy, irekreklamo dagiti umili iti nasao a lugar ti nasao a pagtagilakuan gapu iti kina-angot dagiti maitamtambak ken mailaklako a chicken dung sadiay.
Gapu iti daytoy, impaulog ti ama ti munisipyo ti stoppage order nga inserbi ti agarup 50 nga indibidual manipud iti La Trinidad PNP, Mayor’s Office, Municipal Business Permits and Licensing Office, Municipal Legal Office ken dagiti barangay tanod ti Shilan para iti panakairikep ti nasao a negosyo.
Sigun kadagiti otoridad, daytoy iti maikatlo a gundaway a naiserbi ti kapada a pammilin kalpasan a saan a nagtungpal ti operator kadagiti immuna a dua nga stoppage orders.
Gapu iti daytoy, kinali dagiti otoridad ti sangwanan ti nasao a site tapnu saanen a makastrek dagiti trucks a maar-aramat a mangibibiahe kadagiti chicken dungs.
Nangikabilda pay iti notice ken 13 a kayo ken metal nga alad ken barb wire tapnu saanen a malukatan ti nasao a chicken dung trading ken permanente a mairikep daytoy.
Kabayatanna, saan a naliklikan ni Rose Maliones, operator ti nasao a pagtagilakuan nga agprotesta ken kinunana nga ikkatenda amin a naimuntar nga alad ken barb wire tapnu mairuarda ti pito a lugan a nakaparada iti uneg ti site.
Nagresulta daytoy iti panakadutok dagiti agbantay iti nasao a disso tapnu maipasigurado a saan a mawarwar dagiti naipasdek nga alad.
Kabayatanna, kinuna ti Municipal Legal Office a nakalukat ti opisinada iti aniaman nga apela ti nasao nga operator.
Inyapela pay ni Maliones ti panakaiparikep met ti kaabayda a chicken dung trading nga adda iti masakupan ti La Trinidad.
